Піліп Орлік мацуе беларускі ўязны турызм

Ва ўкраiнцаў на Вiлейшчыне свае iнтарэсы - тут, у вёсцы Касута, 335 гадоў таму нарадзiўся выдатны дзяржаўны дзеяч Украiны, гетман i аўтар яе першай Канстытуцыi Пiлiп Орлiк. Нездарма вось ўжо некалькi гадоў запар сюды прыязджаюць дэлегацыi беларускiх i ўкраiнскiх навукоўцаў, прадстаўнiкi Украiнскага пасольства, краязнаўцы i грамадскiя дзеячы. Паступова несправядлiва забытае iмя Пiлiпа Орлiка вяртаецца на яго гiстарычную радзiму. Нядаўна Вiлейшчына адзначыла 335‑годдзе з дня нараджэння слаўнага сына двух народаў. Падчас урачыстасцяў зноў была агучана iдэя стварэння ў Касуце турыстычнага цэнтра, пры чым не толькi для ўкраiнскiх гасцей.

Вiлейшчына - маляўнiчы i багаты сваёй гiсторыяй край, а асоба i бiяграфiя Пiлiпа Орлiка надзвычай цiкавая i павучальная, нездарма яму прысвячаюць навуковыя працы, даследаваннi i чытаннi. I тое, што адбываецца вось ужо не першы год у кастрычнiку ў Касуце i Вiлейцы, дэманструе, што гэтыя два складнiкi могуць быць выкарыстаны i для патрыятычнага выхавання моладзi, i для прыцягнення сюды турыстаў. Сёлета свята атрымалася асаблiва цёплым. Яно пачалося памiнальнай службай у Касуцiнскай Свята‑Пятра‑Паўлаўскай царкве. Потым прадстаўнiкi Украiнскага пасольства, кiраўнiцтва раёна, грамадскiх аб’яднанняў, навукоўцы i мясцовыя жыхары ўсклалi кветкi да памятнага знака, якi быў адкрыты ў Касуце год таму. Плануецца, што на гэтым месцы ў блiжэйшы час паўстане помнiк Пiлiпу Орлiку. Iдзе размова i пра стварэнне ў Касуце музея гэтага неардынарнага чалавека.

- Канстытуцыя Пiлiпа Орлiка i сёння ўражвае сваёй актуальнасцю i высокiм прававым узроўнем, - сказаў у сваёй прамове Надзвычайны i Паўнамоцны Пасол Украiны ў Беларусi Iгар Лiхавы. - Сучасныя навукоўцы i палiтыкi не без падстаў называюць яе адной з самых дэмакратычных канстытуцый, у якой яскрава адлюстраваны iдэалы ўкраiнскай нацыi.

Асаблiвым момантам свята стала выкананне ўкраiнскiм фальклорным ансамблем "Ватра" i народным хорам "Криниця" песнi‑гiмна "Боже Великий, Единий, нам Украiну храни". У той жа дзень у горадзе Вiлейка была адкрыта памятная дошка на вулiцы, якая атрымала назву ў гонар Пiлiпа Орлiка. Потым госцi наведалi Вiлейскi краязнаўчы музей. На завяршэнне адбыўся вялiкi канцэрт з удзелам украiнскiх ансамбля i хору i самадзейных мастацкiх калектываў Вiлейкi.