Гістарычныя навіны

Мазырцы змагаюцца за свой мадэрн

18.02.2008

Грамадскасць Мазыра (Гомельская вобласць) дабіваецца надання статусу гісторыка‑культурнай каштоўнасці адзінаму, які добра захаваўся ў горадзе, будынку у стылі мадэрн - двухпавярховаму цаглянаму жылому дому №28 па вуліцы Ленінскай. Аб гэтым паведаміў БелаПАН старшыня пярвічнай Мазырскай гарадской суполкі грамадскага аб’яднання "Беларускае добраахвотнае таварыства помнікаў гісторыі і культуры" Павел Наздра.

Паводле яго слоў, гэты будынак пачатку XX стагоддзя мае як мастацкую, так і гістарычную каштоўнаць, бо перажыў дзве сусветныя вайны і захаваўся да нашых дзён; ён упрыгожвае гістарычную частку горада сваім непаўторным выглядам . Як паведаміў П.Наздра, з будынка выселены жыхары, і ходзяць чуткі, што гэты помнік архітэктуры гарадскія ўлады збіраюцца знесці.

Паводле слоў П.Наздры, нядаўна з Міністэрства культуры, куды, акрамя Мазырскага райвыканкама, ён звяртаўся з просьбай аб наданні будынку статусу гісторыка‑культурнай каштоўнасці, атрыманы адказ. Намеснік міністра Уладзімір Грыдзюшка паведаміў, што з улікам інфармацыі Мазырскага райвыканкама згаданае пытанне ва ўстаноўленым законам парадку будзе вынесена на разгляд Беларускай рэспубліканскай навукова‑матадычнай рады па пытаннях гісторыка‑культурнай спадчыны пры Міністэрстве культуры.

Як паведамляе П.Наздра, грамадскасць будзе дабівацца захавання гэтага будынка нягледзячы на пазіцыю ўлады, для "якой прасцей знесці гэты помнік архітэктуры, чым яго захаваць, бо, на думку чыноўнікаў, рэстаўрацыя будынка будзе вельмі дорага каштаваць".

Крыніца: "Наша Ніва"

Спадабаўся матэрыял? Падзяліцеся з сябрамі!

«Папярэдняя |  Усе за дзень  | Наступная»
Каментары чытачоў
Няма каментароў. Ваш каментар будзе першы.

Вы можаце пакінуць свой каментар, уласную думку ці пытанне па выкладзенаму вышэй матэрыялу.