Выйшла кніга прысвечаная культаваму дойлідcтву Заходняй Беларусі

Кніга Сяргея Харэўскага " Культавае дойлідcтва Заходняй Беларусі 1915-1940 г." прысьвечаная аднаму з найменш вывучаных этапаў разьвіцьця айчыннае архітэктуры - дойлідcтву Заходняе Беларусі, разьвіцьцё якога ішло асобна ад 1915 г., калі палова краіны была акупаваная войскамі кайзэраўскае Нямеччыны, да 1939 г.

У міжваенны час у Заходняй Беларусі быў сапраўдны будаўнічы бум. Пра размах можна меркаваць па дзяржаўным пляне на 1938-39 год. Толькi ў Браслаўскiм павеце аб’ектаў грамадзкага i сацыяльнага прызначэньня планавалася ўзьвесьцi 144.

Важнай часткаю заходнебеларускае архітэктуры было будаўніцтва храмаў. У Заходняй Беларусі да 1939 г. дзейнічала 446 касцёлаў, 542 царквы, 387 сінагог, 14 манастыроў. Сьвятарскую паслугу выконвалі 617 каталіцкіх, 606 праваслаўных сьвятароў, 293 рабіны. Да 1939 г. у СССР налічвалася 50 тыс. каталікоў, пасьля далучэньня - 6,5 млн. Рэпрэсіі і атэістычная прапаганда спынілі канчаткова разьвіцьцё сакральнае архітэктуры ў 1940 г.

Кніга С. Харэўскага ўводзіць ва ўжытак малавядомыя дакумэнты і факты з гісторыі культуры Заходняй Беларусі. Напісаная жывой, вобразнай моваю, яна адрасаваная ўсім цікаўным да гісторыі беларускай і сусьветнай культуры.

Крыніца: "Наша Ніва"