Гістарычныя навіны

Гродзенская крэпасць можа стаць беларускай гісторыка-культурнай каштоўнасцю

28.06.2008

Прапанова аб неабходнасці надаць статус гісторыка-культурнай каштоўнасці аб'ектам архітэктуры Гродзенскага раёна - фартам Гродзенскай крэпасці 1887-1915 гадоў і фартыфікацыйным збудаванням 68-га Гродзенскага ўмацаванага раёна 1940-1941 гадоў будзе пададзена ў Савет міністраў.

Паводле намесніка міністра культуры Уладзіміра Грыдзюшкі, рэспубліканская навукова-метадычная рада па пытаннях гісторыка-культурнай спадчыны пры Міністэрстве культуры Беларусі на сваім апошнім паседжанні прыняла рашэнне аб неабходнасці надання такога статусу названым аб'ектам.

Будаўніцтва фартоў пачалося ў 1887 годзе. Спачатку гродзенскія ўмацаванні мелі часовы характар. Аднак пасля расійска-японскай вайны было вырашана будаваць у Гродне крэпасць, праект якой і быў зацверджаны імператарам Мікалаем ІІ у жніўні 1912 года. Планавалася будаўніцтва 13 фартоў і 23 апорных пунктаў, а таксама адкрытых батарэй для гармат буйнога калібру, асобных укрыццяў для пяхоты, аэрадрома, плаціны, дарогі і шэрага іншых дапаможных збудаванняў. Для ўзвядзення крэпасці былі створаны 14 будаўнічых участкаў, але да пачатку Першай сусветнай вайны ніводзін з іх не быў завершаны.

Збудаванні Гродзенскай крэпасці таксама ўваходзілі ў склад 68-га Гродзенскага ўмацаванага раёна, пабудаванага ў 1940-41 гадах у Заходняй асобай ваеннай акрузе. З гродзенскімі фартамі звязаны і трагічныя падзеі Вялікай Айчыннай вайны: знішчэнне гітлераўцамі мірных жыхароў у форце ІІ і спроба савецкіх войскаў утрымаць у ліпені 1944 плацдарм у раёне форта І.

"Радыё Рацыя"

Спадабаўся матэрыял? Падзяліцеся з сябрамі!

«Папярэдняя |  Усе за дзень  | Наступная»
Каментары чытачоў
Няма каментароў. Ваш каментар будзе першы.

Вы можаце пакінуць свой каментар, уласную думку ці пытанне па выкладзенаму вышэй матэрыялу.