Гістарычныя навіны

Буйныя археалагічныя знаходкі ў Косава

15.07.2008

Расійскія манеты 20-40-х гадоў XIX стагоддзя (дзве сярэбраныя і сем медных) знайшлі студэнты Брэсцкага дзяржаўнага універсітэта імя А.С.Пушкіна ў час археалагічных раскопак у Косаўскім палацы (Івацэвіцкі раён Брэсцкай вобласці). Аб гэтым паведаміў выкладчык універсітэта, вядучы спецыяліст па археалогіі прадпрыемства "Брэстрэстаўрацыяпраект" Аляксандр Башкоў.

У Косаўскім палацы, дзе вядуцца рэстаўрацыйныя работы, гэтым летам археалагічную практыку праходзяць дзве групы студэнтаў гістарычнага факультэта універсітэта імя А.С.Пушкіна. У ходзе археалагічных даследаванняў знойдзены фрагменты быту, інтэр'ера некалі унікальнага палаца, у іх ліку дэталі дарагіх сталовых сервізаў, каміннай кафлі. Дастаткова цікавыя выяўленыя ў ходзе раскопак манеты. Яны былі знойдзены пры абследаванні фундамента аднаго з флігеляў палаца. На думку спецыяліста, гэта так званы сакральны скарб, які па традыцыі замуроўваўся пры закладцы новага будынка.

Як паведаміў Аляксандр Башкоў, пасля завяршэння раскопак і навуковай апрацоўкі матэрыялу ўсе знаходкі будуць перададзены ў Брэсцкі абласны краязнаўчы музей. Хутчэй за ўсё, яны папоўняць экспазіцыю размешчанага каля Косаўскага палаца музея-сядзібы Т.Касцюшкі.

Косаўскі палац - унікальны ўзор неагатычнай архітэктуры і мастацтва ХIХ стагоддзя. Сваю гісторыю ён вядзе з 1838 года. Тады буйны прамысловец граф Пуслоўскі вырашыў пабудаваць палац па праекту французскага дойліда. Унікальны ў Еўропе палацава-замкавы комплекс уражваў хараством да сярэдзіны ХХ стагоддзя. Арачныя вокны, паркавыя тэрасы, усяго тут было 132 пакоі і зала, кожны з іх меў сваё прызначэнне і аздабленне. Вежы ўзвялі па колькасці месяцаў у годзе. Палац быў пабудаваны так, каб кожны год сонца па два з палавінай дні асвятляла адзін пакой, а сістэма ўнутраных праходаў і вокнаў давалі промням магчымасць трапляць у кожны куток палаца. Але галоўнай адметнасцю быў парадны пакой са шкляной падлогай або акварыумам. Пад нагамі ў гасцей плавалі сотні экзатычных рыбак.

На жаль, усе каштоўнасці палаца, а таксама унікальны сад, які налічваў амаль 150 відаў раслін, з часам былі страчаны. Да нашых дзён захаваліся толькі вонкавыя сцены, якія працягваюць уражваць сваімі памерамі і экзотыкай дэкаратыўных элементаў.

Палац у Косава
Руіны косаўскага палацу

У 2008 годзе Косаўскі палацава-паркавы ансамбль зацверджаны ў якасці рэспубліканскага прыярытэтнага аб'екта на правядзенне рэстаўрацыі. Архітэктарам трэба будзе літаральна адрадзіць унікальны палац. Па плану тут будзе створаны гасцінічна-турыстычны комплекс. Першая чарга адноўленага палаца павінна быць здадзена да 2011 года. На 2008 год на правядзенне рэстаўрацыйных работ з рэспубліканскага бюджэту выдзелена Br400 млн., з мясцовага - Br250 млн.

"Радыё Рацыя"

Каментары чытачоў
Няма каментароў. Ваш каментар будзе першы.

Вы можаце пакінуць свой каментар, уласную думку ці пытанне па выкладзенаму вышэй матэрыялу.