Планы рэстаўрацыі Лошыцкага сядзібнага дома да сённяшняга часу не вядомыя

Міністэрства культуры пераадрасавала ў Мінскі гарвыканкам адозву старшыні Беларускага добраахвотнага таварыства аховы помнікаў гісторыі і культуры Антона Астаповіча ў сувязі з планамі рэстаўрацыі Лошыцкага сядзібнага дома - помніка архітэктуры эклектыкі канца XIX - пачатку XX стагоддзяў, унесенага ў Дзяржаўны спіс гісторыка-культурных каштоўнасцей Рэспублікі Беларусь.

У лісце за подпісам намесніка міністра культуры Уладзіміра Грыдзюшкі, які паступіў А.Астаповічу 14 ліпеня, паведамляецца, што адозва накіравана ўладам сталіцы "для разгляду і адказу ў межах сваёй кампетэнцыі з улікам інфармацыі Міністэрства культуры па згаданым пытанні".

У інтэрв'ю БелаПАН А.Астаповіч назваў адказ Мінкульта "дзіўным". Паводле яго слоў, распрацоўкай планаў аднаўлення помнікаў архітэктуры займаюцца структуры Міністэрства культуры: упраўленне па ахове гісторыка-культурнай спадчыны і рэстаўрацыі, а таксама Беларуская рэспубліканская навукова-метадычная рада па пытаннях гісторыка-культурнай спадчыны.

"Пераадрасаванне нашай адозвы ў Мінгарвыканкам сведчыць пра тое, што Міністэрства культуры адмаўляецца выконваць свае непасрэдныя задачы па ахове гісторыка-культурнай спадчыны", - падкрэсліў А.Астаповіч.

Ён нагадаў, што 13 чэрвеня звярнуўся ў Мінкульт у сувязі з намерам уладаў сталіцы правесці гэтак званую рэстаўрацыю сядзібы, якая будзе заключацца ў разбурэнні унікальнага помніка і ўзвядзеннні на яго месцы муляжу з газасілікатных блокаў.

У сваім лісце А.Астаповіч выказаў занепакоенасць запланаванымі работамі, якія прадугледжваюць разборку асноўных аўтэнтычных канструкцый помніка архітэктуры і замену іх новымі канструкцыямі з сучасных матэрыялаў, што з'яўляецца парушэннем закона Рэспублікі Беларусь "Аб ахове гісторыка-культурнай спадчыны" і агульнапрынятых міжнародных методык. Старшыня таварыства папрасіў даць тлумачэнні наконт перспектыў рэстаўрацыйна-аднаўленчых работ у Лошыцкім сядзібным доме і інфармацыю аб праекціроўшчыку, замоўцы, падраднай арганізацыі і наяўнасці дазволу Міністэрства культуры на правядзенне работ на аб'екце, які ўяўляе сабою гісторыка-культурную каштоўнасць