Гістарычныя навіны

У Вільні знайшлі калекцыю старадаўняй беларускай музыкі

24.09.2008

У архівах Вільні музыказнаўцы Сьвятлана Немагай і Аляксей Фралоў выявілі дзясяткі музычных твораў аўтараў XVI-XIX стагодзьдзяў, якія паходзяць зь Беларусі.

У інтэрвію БелаПАН сп. Фралоў адзначыў, што асаблівую цікавасьць уяўляюць шматлікія сымфоніі і сэрэнады эпохі Вольфганга Амадэя Моцарта.

“Дагэтуль было прынята лічыць, што гэтыя жанры зьявіліся на Беларусі толькі ў XX стагодзьдзі. Імёны таленавітых аўтараў гэтай цудоўнай, высокапрафэсійнай музыкі былі загубленыя ў вірах гісторыі на 150 гадоў і сёньня вяртаюцца ў нашу музычную культуру. Дамінік Адамовіч, Ян Сакалоўскі, Ян Чамароўскі, кампазытары Зарашэўскі, Маркевіч, Плашына, Пятровіч, Руткоўскі, Чупрынскі, а таксама ананімныя аўтары - маэстра эпохі клясыцызму і раньняга рамантызму, якія ўпрыгожылі музычны краявід Беларусі канца XVIII - першай паловы XIX стагодзьдзя яркімі сымфоніямі: вытанчанымі і грацыёзнымі, забаўляльнымі і, разам з тым, сур’ёзнымі”, - сказаў Аляксей Фралоў.

Па яго словах, многія са знойдзеных музычных рукапісаў паходзяць зь незаслужана забытага аазысу беларускай культуры ў фальварку Забелы Верхнядзьвінскага раёну Віцебскай вобласьці, дзе ажно да 1840-х гадоў квітнела духоўная і сьвецкая культура, дзейнічала выдатная музычная капэля пад кіраўніцтвам кампазытара і дырыжора Міхала Кавалеўскага.

“Унікальная знаходка сьведчыць, што многія старадаўнія музычныя асяродкі Беларусі чакаюць свайго адкрыцьця і дасьледаваньня”, - падкрэсьліў Аляксей Фралоў.

Вернутых твораў аказалася настолькі шмат, што налета палянуецца правесьці фэстываль “Адраджэньне беларускай сымфоніі”, у якім прымуць удзел вядучыя музычныя калектывы краіны.

І ўжо 25 верасьня 2008 года адбудзецца своеасаблівы анонс гэтага фэстывалю. У выкананьні ансамбля салістаў “Клясык-Авангард” у Малой залі імя Рыгора Шырмы Белдзяржфілярмоніі ў праграме “Мэлёдыі Радзівілаўскіх паркаў” сярод твораў Мацея Радзівіла, Яна Абрахама Шульца, Яна Давіда Голанда і Міхала Клеафаса Агінскага прагучаць тры сэрэнады загадкавага маэстра Плашыны з Полаччыны, аўтара шасьці сымфоній.

“Слухачоў чакае незабыўная музыка, атмасфэра таямнічых паркавых алей і спатканьняў у ціхіх альтанках, шоргат пышных крыналінаў чароўных дам, цёплае зіхаценьне сьвечак у строгіх кандэлябрах”, - адзначыў Аляксей Фралоў.

Крыніца: "Радыё Свабода"

Каментары чытачоў
Няма каментароў. Ваш каментар будзе першы.

Вы можаце пакінуць свой каментар, уласную думку ці пытанне па выкладзенаму вышэй матэрыялу.